14–17 қыркүйек аралығында Грузияның Тбилиси қаласында D4A жобасына қатысушы елдердің (Молдова, Армения, Грузия) зертханалық диагностикасын жетілдіруге, оның ішінде қан ағымы инфекциялары мен желдеткішпен байланысты пневмонияларды зертханалық диагностикалауды жақсартуға бағытталған жұмыс кеңесі өтті. Колумбия университеті жанындағы ICAP халықаралық ұйымының қолдауымен өткен аталған кеңеске «Х. Жұматов атындағы гигиена және эпидемиология ғылыми орталығы» филиалы қан ағымы инфекцияларын зертханалық диагностикалау бойынша кеңесші ретінде қатысты.

Семинардың техникалық сессияларын Шығыс Еуропа және Орталық Азия (ШЕОА) бойынша CDC далалық кеңсесінің қызметкерлері ICAP командасының қолдауымен және CDC-нің Атлантадағы штаб-пәтерінен шақырылған мамандардың қатысуымен өткізді. Кеңес барысында деректер базасын басқару, деректер базасын қалыптастыруда жасанды интеллектіні пайдалану, сондай-ақ қатысушы елдерде инфекцияларға эпидемиологиялық қадағалауды ауқымдау бойынша алдағы қадамдар мәселелері қарастырылды.